అనంత వేదసంవేద్య లక్ష్మీనాథాంత కారణ ।
జ్ఞానానందైశ్వర్యపూర్ణ నమస్తే కరుణాకర ॥
నక్షత్రాణి చ గణ్యంతే పాంసవశ్చ క్షణాదయః ।
త్వద్వీర్యాణి న గణ్యంతే బ్రహ్మణా రమయాపి వా ॥
తథాప్యహం భక్తదాసదాసదాసో యథామతి ।
స్తౌమి త్వాం వేంకటాధీశ త్వద్భక్తః ప్రేరితస్త్వయా ॥
శ్రీ వేంకటేశ మత్స్వామిన్ జ్ఞానానందదయానిధే ।
భక్తవత్సల భో విశ్వకుటుంభిన్నధునావ మామ్ ॥
సత్యేశం సత్యసంకల్పం సత్యం సత్యవ్రతం హరిమ్ ।
సత్యచర్యం సత్యయోనిం సత్యశీర్షమహం భజే ॥
శ్రవణాత్ సర్వపాపఘ్నం మననాత్ పుణ్యవర్ధ నమ్ ।
స్వధ్యానాత్ సిద్ధిదం విష్ణుం ప్రేక్షణాన్మోక్షదం భజే ॥
శ్రీ వేంకటేశం లక్ష్మీశమనిష్టఘ్నమభీష్టదమ్ ।
చతుర్ముఖాత్మతనయం శ్రీనివాసం భజేऽనిశమ్ ॥
యదపాంగలవేనైవ బ్రహ్మాద్యాః స్వపదం యయుః ।
మహారాజాధిరాజం త్వాం శ్రీనివాసం భజేऽనిశమ్ ॥
అనంతవేదసంవేద్యం నిర్దోషం గుణసాగరమ్ ।
అతీంద్రియం నిత్యముక్తం శ్రీనివాసం భజేऽనిశమ్ ॥
స్మరణాత్సర్వదోషఘ్నం శ్రవణాదిష్టవర్షిణమ్ ।
దర్శనామ్ముక్తిదం వీరం శ్రీనివాసం భజేऽనిశమ్ ॥
అశేషశయనం శేషశయనం శేషశాయినమ్ ।
శేషాద్రీశమశేషం చ శ్రీనివాసం భజేऽనిశమ్ ॥
భక్తానుగ్రాహకం విష్ణుం సుశాంతం గరుడధ్వజమ్ ।
ప్రసన్న వక్త్రనయనం శ్రీనివాసం భజేऽనిశమ్ ॥
భక్త భక్తిసుపాశేన బద్ధ సత్పాదపంకజమ్ ।
సనకాదిధ్యాన గమ్యం శ్రీనివాసం భజేऽనిశమ్ ॥
గంగాదితీర్థ జనక పాదపద్మం సుతారకమ్ ।
శంఖచక్రాభయకరం శ్రీనివాసం భజేऽనిశమ్ ॥
సువర్ణ ముఖతీరస్థం సువర్మేఢ్యం సువర్ణదమ్ ।
సువర్ణాభం సువర్ణాంకం శ్రీనివాసం భజేऽనిశమ్ ॥
శ్రీవత్సవక్షసం శ్రీశం శ్రీలోలం శ్రీకరగ్రహమ్ ।
శ్రీమంతం శ్రీనిధిం శ్రీఢ్యం శ్రీనివాసం భజేऽనిశమ్ ॥
వైకుంఠవాసం వైకుంఠ త్యాగం వైకుంఠసోదరమ్ ।
వైకుంఠదం వికుంఠాజం శ్రీనివాసం భజేऽనిశమ్ ॥
వేదోద్ధారం మత్స్యరూపం స్వచ్ఛాకారం యదృచ్ఛయా ।
సత్యవ్రతోద్ధరం సత్యం శ్రీనివాసం భజేऽనిశమ్ ॥
మహాగాధజలాధారం కచ్ఛపం మందరోద్ధరమ్ ।
సుందరాంగం చ గోవిందం శ్రీనివాసం భజేऽనిశమ్ ॥
వరం శ్వేతవరాహాఖ్యం సంహృత్య ధరణీహరమ్ ।
దంష్ట్రాకృతధరోద్ధారం శ్రీనివాసం భజేऽనిశమ్ ॥
ప్రహ్లాదాహ్లాదకం లక్ష్మీనృసింహం భక్తవత్సలమ్ ।
దైత్యమత్తేభదమనం శ్రీనివాసం భజేऽనిశమ్ ॥
వామనం వామనం పూర్ణకామం వామనమానవమ్ ।
మాయినం బలిసంమోహం శ్రీనివాసం భజేऽనిశమ్ ॥
ఇంద్వాననం కుందదంతం కురాజఘ్నం కుఠారిణమ్ ।
సుకుమారం భృగుఋషేః శ్రీనివాసం భజేऽనిశమ్ ॥
శ్రీరామం దశదిగ్వ్యాప్తం దశేంద్రియనియామకమ్ ।
దశాస్యఘ్నం దాశరథిం శ్రీనివాసం భజేऽనిశమ్ ॥
గోవర్ధనోద్ధరం బాలం వాసు దేవం యదూత్తమమ్ ।
దేవకీతనయం కృష్ణం శ్రీనివాసం భజేऽనిశమ్ ॥
నంద నందనమానందమింద్రనీలం నిరంజనమ్ ।
శ్రీయశోదాయశోదం చ శ్రీనివాసం భజేऽనిశమ్ ॥
గోబృందావనగం బృందావనగం గోకులాధిపమ్ ।
ఉరు గార్య జగన్మోహం శ్రీనివాసం భజేऽనిశమ్ ॥
పారిజాతహరం పాపహరం గోపీమనోహరమ్ ।
గోపీవస్త్రహరం గోపం శ్రీనివాసం భజేऽనిశమ్ ॥
కంసాంతకం శంసనీయం సంశాంతిం సంసృతిచ్ఛిదమ్ ।
సంశయచ్ఛేదిసంవిత్కం శ్రీనివాసం భజేऽనిశమ్ ॥
కృష్ణాపతిం కృష్ణగురుం కృష్ణామిత్రమభీష్టదమ్ ।
కృష్ణాత్మకం కృష్ణసఖం శ్రీనివాసం భజేऽనిశమ్ ॥
కృష్ణాహిమర్దనం కృష్ణం కృష్ణోపవన లోలుపమ్ ।
కృష్ణాతాతం మహెూత్కృష్టం శ్రీనివాసం భజేऽనిశమ్ ॥
బుద్ధం సుబోధం దుర్బోధం బోధాత్మానం బుధప్రియమ్ ।
విబుధేశం బుధైర్బోధ్యం శ్రీనివాసం భజేऽనిశమ్ ॥
కల్కినం తురగారూఢం కలికల్మషనాశనమ్ ।
కల్యాణదం కలిఘ్నం చ శ్రీనివాసం భజేऽనిశమ్ ॥
హరిం హంసం కృష్ణం నరహరిమనంతం మధురిపుం ।
హృషీ కేశం యజ్ఞం కపిలమృషభం వాజివదనమ్ ॥
నరం వ్యాసం నారాయణమనఘమాత్మానమమృతం ।
భజే దత్తాత్రేయం పురుషమథ ధన్వంతరిమపి ॥
అనంతరూపస్వమనంతచర్య
మనంత వేదైరనువర్ణనీయమ్ ।
అనంతనామానమనంత దేవ-
మనంత కల్యాణగుణాభిరామమ్ ॥
అనంతశక్త్యంశ మనంత విక్రమం
హ్యనంతదేహే చ శయానమీశ్వరమ్ ।
అనంతసౌభాగ్యమనంత నేత్ర-
మనంతపాదాదిమనంత సౌఖ్యమ్ ॥
అసురాచలౌఘహర చక్రధరం
దురితాచలౌఘహరవజ్రధరమ్ ।
కరుణాచలౌఘభరచిత్తవరం
కనకాచలౌఘదరపద్మకరమ్ ॥
భువనేషు వేంటేశ్వర బహువురుషార్థ ప్రదానపుణ్యస్త్వమ్ ।
నో చేద్వ్యక్తతయా త్వం బహూన్నతాద్రిస్థలే కుతో వససి ॥
గుణౌఘైరపారం స్ఫురద్రత్న హారం
స్మరద్దోషహారం స్వభక్తేష్టపూరమ్ ।
భజే వేంటేశం ఫణీశాద్రివాసం
సదా మందహాసం శ్రియా సద్విలాసమ్ ॥
వేంకటేశచరణౌ తవ వందే
సర్వతీర్థ శరణౌ శరణౌ మే ।
మావిధాతృశివవీశ ఫణీశేం-
ద్రార్కసోమహుతభుఙ్ముఖవంద్యౌ ॥
శ్రీనివాస చరణౌ తవ వందే
లోకపావన సుకుంకుమవర్ణౌ ।
శ్రీప్రదౌ కిల సురర్షినృపాణాం
శ్రీఋగాదినిగమాగమవేద్యౌ||
భజే భజక సౌఖ్యకృన్నిజ కటాక్ష సంప్రేక్షణం
పరాత్పరతరం దరం దధతమబ్జచక్రే గదామ్ ।
చతుర్భుజమథోక్షజం కమలజేశపూర్వార్చితం
వరోద్ధతఖలాన్ బహూన్ ఝటితి సంహరంతం రిపూన్ ॥
అజ్ఞానసాగర సముత్తరణే ప్రశస్తం
సుజ్ఞాన సేతురచనే నిపుణం బుధేఢ్యమ్ ।
లక్ష్మీపతిం సురవరార్చిత వేంకటేశం
దారిద్ర్యదుఃఖదురితౌఘనిశాచరఫ్నమ్ ॥
లక్ష్మీనాథం కమలనయనం హార కేయూర భూషం
సర్వవ్యాప్తం బహుగుణభరం దోషదూరం దయాబ్ధిమ్ ।
స్వానాం తాపత్రయహరమజం నిర్విశేషం విశేషం
లోకాతీతం పురుషమతులం భావయామేష్ట దేవమ్ ॥
శ్రీమద్వేంకటనాథ పాదజనితా గంగా జగత్పావనీ
యస్యాపాంగనిరీక్షణం విధి భవేంద్రార్కాది సర్వేష్టదమ్ ।
యన్నామస్మరణం మహాఘహరణం స్వర్గ్యం చ మోక్షప్రదం
యత్పాదాంబుజయుగ్మ సేవనరతో బ్రహ్మాదిభిః పూజ్యతే ॥
దృష్ట్యాద్యత్యంతదూరం నిగమనిచయ వేద్యాత్మమాహాత్మ్య పూర్ణం
సర్వేషామాదిమిత్రం రవిశశినయనం పూర్ణ కారుణ్య దేహమ్ ।
నిర్వాణం నిష్ప్రపంచం నిరవధిక సమామ్నాయ సం ఘైరసంగై-
ర్గీర్వాణాద్యైరజస్రం స్తుతినతినియమైకాంత భకైశ్చ పూజ్యమ్ ॥
కింకరశంకర బహుకర
తవ బహుచరితం సమ సభువనేషు ।
జ్ఞాపయతి భక్తిమద్భ్యః
ఫణిపతిశుక పైల నారదప్రముఖై : ॥
వేంకటేశమనుసృత్య య ఆస్తే
తస్య భూరి సుభగం దశదిక్షు ।
ఐహికం త్రిదివసౌఖ్యమతుల్యం
మోక్షమాశు లభతే గుణసామ్యమ్ ॥
శ్రీనిధిం త్విహ జహాతి మదాంధో
యోऽస్య దుఃఖమసమం దశదిక్షు ।
ఐహికం భవతి రౌరవకుంభీ-
పాక పావక తమిస్రమముత్ర ॥
విపద్ ఘ్నం శుభదోగ్ధారం భక్తానాం వశవర్తినమ్ ।
లోకపూజ్యం రమానాథం భజేహం ప్రతిజన్మసు ॥
భక్తౌఘానుగ్రహార్థాయ త్యక్త్వా వైకుంఠముత్తమమ్ ।
ధరణ్యామవతీర్ణోऽ సి వరేణ్యో వరదోऽర్చితః ॥
అప్యల్పమాత్రం పరవస్తు లోకే
నైవాపహార్యం కిల సత్యసంధ ।
జనై రనేకైర్బహుజన్మయత్నై-
రాయాససాధ్యం బహుతాపసంచయమ్ ॥
హరస్యశేషం స్మృతిమాత్ర తస్త్వం
వాణీమనో దృష్టి పథాద్యగోచరః ।
విలక్షణ స్థావర జంగమాత్మకం
వీక్షే బహూపాయవిశారదం త్వామ్ ॥
తవ రూపాణ్యనంతాని చరిత్రాణి తథైవచ ।
స్మరతాం భక్తిపూర్వం తు మహావిభవదాని చ ॥
ఇహాముత్రాతుల్యసౌఖ్యప్రదాని మహతామపి ।
అల్పానాం కిము వక్తవ్యం స్వరూపోద్ధార కాణి చ ॥
ప్రపద్యే పుండరీకాక్షమీశం భక్తానుకంపినమ్ ।
లోకోత్తరం లోకనాథం పరాత్పరతరం విభుమ్ ॥
పుణ్యాత్ త్వద్దయయా లబ్ధం విశేషాదకుతోభయమ్ ।
భగవంతం విశ్వవంద్యం భూతభవ్యభవత్ప్రభుమ్ ॥
యతో భూతాని జాయంతే యేన సర్వమిదం తతమ్ ।
యేన జాతాని జీవంతి యం ప్రాప్స్యంతి మహాలయే ॥
దీపవిద్యుత్తారకాగ్ని చంద్ర సూర్యాది దీప్తిమాన్ ।
యో యోగైర్యోగ యోగ్యైశ్చ దృశ్యోऽదృశ్యోऽశ్రుతః శ్రుతః ॥